ਲਾਈਫਸਟਾਈਲ ਡੈਸਕ: ਬਰਸਾਤ ਦਾ ਮੌਸਮ ਆਉਂਦੇ ਹੀ ਮੱਛਰਾਂ ਦੀ ਸਮੱਸਿਆ ਵੀ ਕਾਫ਼ੀ ਵੱਧ ਜਾਂਦੀ ਹੈ। ਤੁਸੀਂ ਅਕਸਰ ਦੇਖਿਆ ਹੋਵੇਗਾ ਕਿ ਕੁਝ ਲੋਕਾਂ ਨੂੰ ਮੱਛਰ ਹੋਰਾਂ ਨਾਲੋਂ ਜ਼ਿਆਦਾ ਕੱਟਦੇ ਹਨ। ਇਹ ਸਿਰਫ਼ ਇਤਫ਼ਾਕ ਨਹੀਂ, ਸਗੋਂ ਇਸ ਦੇ ਪਿੱਛੇ ਵਿਗਿਆਨਕ ਕਾਰਨ ਹਨ।
ਮੱਛਰਾਂ ਨੂੰ ਇਹ ਚੀਜ਼ਾਂ ਕਰਦੀਆਂ ਹਨ ਆਕਰਸ਼ਿਤ
ਮੱਛਰ ਮੁੱਖ ਤੌਰ ‘ਤੇ ਕਾਰਬਨ ਡਾਈਆਕਸਾਈਡ (CO₂), ਸਰੀਰ ਦੀ ਗਰਮੀ ਅਤੇ ਪਸੀਨੇ ਦੀ ਨਮੀ ਵੱਲ ਆਕਰਸ਼ਿਤ ਹੁੰਦੇ ਹਨ। ਜਿਨ੍ਹਾਂ ਲੋਕਾਂ ਦੇ ਸਰੀਰ ਦਾ ਤਾਪਮਾਨ ਵੱਧ ਹੁੰਦਾ ਹੈ ਜਾਂ ਜਿਨ੍ਹਾਂ ਨੂੰ ਜ਼ਿਆਦਾ ਪਸੀਨਾ ਆਉਂਦਾ ਹੈ, ਉਨ੍ਹਾਂ ਵੱਲ ਮੱਛਰ ਵੱਧ ਖਿੱਚੇ ਜਾਂਦੇ ਹਨ।
ਕਸਰਤ ਜਾਂ ਦੌੜ ਲਗਾਉਣ ਸਮੇਂ ਸਾਡਾ ਸਰੀਰ ਵੱਧ ਪਸੀਨਾ ਛੱਡਦਾ ਹੈ ਅਤੇ ਸਾਹ ਤੇਜ਼ ਚੱਲਣ ਕਾਰਨ ਕਾਰਬਨ ਡਾਈਆਕਸਾਈਡ ਦੀ ਮਾਤਰਾ ਵੀ ਵੱਧ ਨਿਕਲਦੀ ਹੈ। ਇਹ ਦੋਵੇਂ ਗੱਲਾਂ ਮੱਛਰਾਂ ਨੂੰ ਆਕਰਸ਼ਿਤ ਕਰਦੀਆਂ ਹਨ।
ਇਸੇ ਕਾਰਨ ਗਰਭਵਤੀ ਮਹਿਲਾਵਾਂ ਨੂੰ ਵੀ ਮੱਛਰ ਜ਼ਿਆਦਾ ਕੱਟਦੇ ਹਨ, ਕਿਉਂਕਿ ਗਰਭ ਅਵਸਥਾ ਦੌਰਾਨ ਉਨ੍ਹਾਂ ਦੇ ਸਰੀਰ ਦਾ ਤਾਪਮਾਨ ਅਤੇ ਕਾਰਬਨ ਡਾਈਆਕਸਾਈਡ ਦਾ ਨਿਕਾਸ ਆਮ ਨਾਲੋਂ ਵੱਧ ਹੁੰਦਾ ਹੈ।
ਸਰੀਰ ਦੀ ਮਹਿਕ ਵੀ ਹੈ ਇੱਕ ਕਾਰਨ
ਸਾਡੀ ਚਮੜੀ ‘ਤੇ ਲੱਖਾਂ ਸੂਖਮ ਜੀਵ (ਮਾਈਕ੍ਰੋਬਜ਼) ਰਹਿੰਦੇ ਹਨ, ਜੋ ਵੋਲੇਟਾਈਲ ਆਰਗੈਨਿਕ ਕੰਪਾਊਂਡਸ (Volatile Organic Compounds – VOCs) ਨਾਮਕ ਰਸਾਇਣ ਬਣਾਉਂਦੇ ਹਨ। ਇਨ੍ਹਾਂ ਰਸਾਇਣਾਂ ਦੀਆਂ ਲਗਭਗ 500 ਤੋਂ ਵੱਧ ਕਿਸਮਾਂ ਮਿਲ ਕੇ ਹਰ ਵਿਅਕਤੀ ਦੇ ਸਰੀਰ ਦੀ ਵੱਖਰੀ ਮਹਿਕ ਬਣਾਉਂਦੀਆਂ ਹਨ।
ਕੁਝ ਲੋਕਾਂ ਦੇ ਸਰੀਰ ਦੀ ਇਹ ਕੁਦਰਤੀ ਮਹਿਕ ਮੱਛਰਾਂ ਨੂੰ ਵੱਧ ਪਸੰਦ ਆਉਂਦੀ ਹੈ, ਜਿਸ ਕਰਕੇ ਉਹ ਉਨ੍ਹਾਂ ਨੂੰ ਵਾਰ-ਵਾਰ ਕੱਟਦੇ ਹਨ।
ਹਰ ਵਿਅਕਤੀ ਦਾ ਸਰੀਰ ਵੱਖਰਾ ਰਿਐਕਟ ਕਰਦਾ ਹੈ
ਜਦੋਂ ਮੱਛਰ ਕੱਟਦਾ ਹੈ ਤਾਂ ਸਾਡਾ ਇਮਿਊਨ ਸਿਸਟਮ ਸਰਗਰਮ ਹੋ ਜਾਂਦਾ ਹੈ। ਹਰ ਵਿਅਕਤੀ ਵਿੱਚ ਇਸ ਦੀ ਪ੍ਰਤੀਕਿਰਿਆ ਵੱਖਰੀ ਹੁੰਦੀ ਹੈ। ਇਸ ਕਰਕੇ ਕੁਝ ਲੋਕਾਂ ਨੂੰ ਮੱਛਰ ਦੇ ਕੱਟਣ ਨਾਲ ਹਲਕੀ ਖਾਰਸ਼ ਹੁੰਦੀ ਹੈ, ਜਦਕਿ ਕੁਝ ਲੋਕਾਂ ਦੀ ਚਮੜੀ ‘ਤੇ ਲਾਲ ਨਿਸ਼ਾਨ, ਸੋਜ ਜਾਂ ਚੱਕਤੇ ਬਣ ਜਾਂਦੇ ਹਨ।
ਇਸ ਲਈ ਜੇ ਤੁਹਾਨੂੰ ਲੱਗਦਾ ਹੈ ਕਿ ਮੱਛਰ ਤੁਹਾਨੂੰ ਹੋਰਾਂ ਨਾਲੋਂ ਵੱਧ ਕੱਟਦੇ ਹਨ, ਤਾਂ ਇਹ ਸਿਰਫ਼ ਤੁਹਾਡਾ ਭਰਮ ਨਹੀਂ, ਸਗੋਂ ਇਸ ਦੇ ਪਿੱਛੇ ਸਰੀਰ ਦੀ ਗਰਮੀ, ਕਾਰਬਨ ਡਾਈਆਕਸਾਈਡ, ਪਸੀਨਾ ਅਤੇ ਸਰੀਰ ਦੀ ਕੁਦਰਤੀ ਮਹਿਕ ਵਰਗੇ ਵਿਗਿਆਨਕ ਕਾਰਨ ਹਨ।
